Imis ceris eradere, pro eo quod est delere penitus, sic ut nullum omnino memoriae pristinae vestigium extet. Sumptum ab his qui in ceratis scriptitant tabulis ; his mos est ita nonnunquam versum stilum per summum aequor cerae ducere, ut qualiacumque tamen prioris scripturae remaneant vestigia ; aliquoties funditus delent. Divus Hieronymus ad Chrysogonum : Ita nostrae es necessitudinis penitus oblitus, ut illam Epistolam, quam in corde Christianorum scriptam Apostolus refert, non parva litura sed imis, ut aiunt, ceris eraseris. Conveniet in profundam oblivionem vel amicorum vel pristinae fortunae vel si quid est simile.