In numerato habere, si ad animi res transferatur, proverbii rationem habuerit, velut Octavius Augustus, ut refert Seneca, pronuntiavit de Vinitio oratore, quod ingenium in numerato haberet, propterea quod in causis agendis ingenio esset praesentissimo et quicquid aliis praestaret diutina cogitatio, id illi prima statim animi intentio daret. Sumptum est ab his qui res suas ad certissimum calculum redegerunt, hoc est ad pecuniam numeratam. Quintilianus in sexto : De actore, inquit, facile dicente ex tempore dictum est olim ingenium eum in numerato habere. Vide proverbium Numero dixisti.