Παῖε τὴν ἐπ᾿ ἀρότρου, id est Inflige plagam aratri, sive Impinge vomerem, cum jubebimus strenue pugnare, licet sine arte. Natum aiunt ab hujusmodi fabula, quam narrat Pausanias libro Eliacorum II : Glaucus quidam Carystius cum terram aratro proscindenti forte fortuna vomis excidisset ab aratro, sublatum aptavit manu vice mallei. Quod ubi conspexisset pater Demylus, juvenem produxit in Olympia ad pugilum certamen ; verum ubi jam artis imperitus, plagis afflictus poene deficeret, pater acclamavit : Παῖε τὴν ἐπ᾿ ἀρότρου, admonens ut sic peteret hostem quemadmodum vomere solet vulnerare terram. Hac voce rediit animus juveni vicitque. Idem postea bis vicit Pythia, octies Nemea, item octies Isthmia, auctor Pausanias.