I. 4Toto pectore.xxvi
Cum sincerum et absolutum amorem significamus, Toto pectore dicimus et toto animo : Παντὶ σθήτει καὶ παντὶ θυμῷ. Cicero de legibus libro primo : Ubi illa sancta amicitia, si non ipse amicus per se amatur toto pectore, ut dicitur ? [Leg., 1, 49] Citatur et apud Aristotelem in Ethicis idque proverbii loco : toto animo, παντὶ θυμῷ. Quanquam illud toto pectore etiam ad studium diligentiamque referri potest, ut facit M. Tullius libro epistolarum familiarium decimotertio, epistola prima : De Scapulanis hortis toto pectore cogitemus. [Att., XIII, 12, 4] Idem libro duodecimo : Hanc cogitationem toto pectore amplectare. [Fam., XII, 35, 2] Seneca epistola III : Diu cogita an tibi in amicitiam aliquis recipiendus sit : cum placuerit fieri, toto illum pectore admitte. [Luc., 1, 3] Cornelius Tacitus in Dialogo de oratibus : Quae sinceritas ac disciplina eo pertinebat, ut sincera et integra et nullis pravitatibus detorta uniuscujusque natura toto statim pectore arriperet arteis honestas. [Dial. Or., 28] Divus Augustinus, totis, ut aiunt, visceribus alicubi dixit veluti tropum vulgi consuetudini molliens. [Du. An., 10] Hebraei dicunt : toto corde. [Deut., 4, 29]