Νεοττοῦ οὐδέν μοι δίδως, id est Nihil mihi de vitello dedisti. Quadrat in eos qui impertiant deteriora, meliora sibi servantes. M. Tullius in libro De Divinatione secundo narrat hujusmodi fabulam, unde consentaneum est hoc mutuatum esse proverbium. Quidam somniarat se videre ovum ex lecti cubicularis fascia pendens illigatum ; id somnium cum ad conjectorem retulisset, responsum est thesaurum indicari, proinde foderet eo loco quo se somniarat ovum videre. Ubi fodisset, reperit aurum argento circumtectum ; misitque paululum ex argento conjectori, dissimulans inventum aurum. Conjector accipiens : Nihilne, inquit, de vitello ?