Mordicus tenere est summa pertinacia tueri, quod Graeci vocant ὀδάξ. M. Tullius Academicarum quaestionum libro primo : Nam ab omnibus ejusmodi visis perspicuitatem, quam mordicus tenere debemus, abesse dicemus. Divus Aurelius Augustinus in epistola quapiam ad divum Hieronymum : Illi me plus movent, qui cum posterius interpretarentur et verborum locutionumque Hebraearum viam atque regulas mordicus, ut fertur, tenerent, non solum inter se non consenserunt, sed etiam reliquerunt multa. In eundem sensum dixit Seneca libro De Beneficiis VII utraque manu. Haec, inquit, Demetrius noster utraque manu tenere proficientem jubet, haec nusquam dimittere.