IV. 2. Erinnys ex tragoedia. xcv

Ἐριννὺς ἐκ τραγῳδίας, id est, Erinnys ex tragoedia, de foedis aniculis. Sumptum est ex Aristophanis Pluto, quo loco dictum est de Penia :

Ἴσως Ἐριννύς ἐστιν ἐκ τραγῳδίας,

id est

At forsan est Erinnys ex tragoedia.

Strabo Geographiae libro IV tradit insulas esse decem in Oceano Gaditano, nomine Cassiteridas, quarum una prorsus inculta sit ; in reliquis habitare homines colore fusco, tunicis utentes ad talos usque demissis, pectoribus cingulo obvinctis, baculos manus gestantes, in summa persimiles Furiis tragicis. Quibus ex verbis apparet hoc habitu Furias in tragoediis induci solere.