Ἔρημον ἐμβλέπειν, id est Desertum intueri, dicebatur qui fixis et attonitis intueretur oculis. Metaphoram mutuati sunt ab iis qui pelagus immensum aut solitudinem tacite intuentur. Multis adest hoc oculorum vitium, ut paulo longius semota non exacte videant ; iis, si quando dicendum est in hominum frequentia, quoniam in neminem certo figunt oculos, desertum intueri videntur. Citatur Aristophanes ex Polyido.