Σὲ δ᾿ οἰωνίσαιτ᾿ ἄν τις ἰδών, id est, Qui te conspexerit augurium poterit capere. Dici consuevit in deformes foedoque aspectu. Veteres ex primo hominis occursu sumebant omen : occurrere formoso felix omen habebatur, occurrere deformi nigroque contra. Romanus quidam imperator, Hadrianus opinor, ut erat omnium superstitionum observantissimus, ex Mauri cujusdam scurrae occursu, mortem ominatus est ; ille jussus abire dictum addit ominosius : Totum vicisti, totum fecisti, nunc deus esto. Nam imperatores defuncti solemnibus quibusdam ceremoniis referebantur in numerum deorum. Juvenalis :
Et cui per mediam nolis occurrere noctem.