IV. 2. Profundum sulcum. xxiii

Βαθεῖαν αὔλακα, id est, Profundum sulcum. Refertur et hoc in Adagionum Collectaneis. Addunt dictum de iis qui cogitationibus profundis ac penitioribus rem expenderent. Sumptum est autem ex Aeschyli tragoedia, cui titulus, Ἑπτα ἐπὶ Θήβας. In qua versus hi dicuntur de Amphiarao :

Βαθεῖαν αὔλακα διὰ φρενῶν καρπούμενος,

Ἐξ ἧς τὰ κεδνὰ βλαστάνει βουλεύματα,

id est,

Sulco e profundo pectoris fructum metens,

Rectae unde cogitationes germinant.

Citatur aliquot locis in Moralibus a Plutarcho, et a Platone, secundo de Republica libro. Allusit ad hoc proverbium aliquot locis M. Tullius, ut in Epistola ad Atticum, libro quarto : Ne βαθήτης mea, quae in agendo apparuit, in scribendo sit occultior. Rursus libro quinto : Admirabere meam βαθύτητα, cum salvi redierimus ; tanta mihi μελέτη hujus virtutis datur. Rursum libro sexto, Epistola prima : Nam nulla re sum delectatus magis quam meam βαθύτητα in Appio tibi, liberalitatem in Bruto probari vehementer gaudeo. Mihi videtur recte quadraturum et in eos qui se metiuntur non aliorum opinione, sed ex recte, secusve factorum conscientia.

Index Adagiorum