IV. 1. Clavam extorquere Herculi. xcv

Qui sibi vindicare conatur quod alius jam potentior occupavit, non infacete dicetur Clavam velle Herculi extorquere. Idque jam pridem apud eruditos proverbii vice celebratur. Natum est autem ab apophthegmate Maronis, cui cum Zoili quidam vitio darent quod non paucos versus Homeri pro suis usurpasset, respondit hoc ipsum magnificum esse facinus vel Jovi fulmen eripere vel clavam extorquere de manu Herculis. Macrobius libro Saturnalium quinto de Marone, qui sic usurpavit Homerica ut fecerit sua : Quia, cum tria haec ex aequo impossibilia putentur, vel Jovi fulmen vel Herculi clavam vel versum Homero subtrahere, quod et si fieri posset, alium tamen nullum deceret vel fulmen praeter Jovem jacere vel certare praeter Herculem robore vel canere quod cecinit Homerus, hic opportune in opus suum quae prior vates dixerat transferendo fecit ut sua esse credantur.

Index Adagiorum