Sibyllae vivacitas proverbio locum fecit. Propertius Elegiarum libro secundo :
Sibyllae aetatem pro quantumvis longa posuit. Hanc Vergilius sexto Aeneidos libro longaevam sacerdotem vocat. Et Servius eum enarrans locum adscribit Apollinem amore Sibyllae captum ei poscendi quod vellet arbitrium dedisse, illam haustis harenis tantum poposcisse vitae. Id Apollo fieri posse respondit, si Erythraeam insulam relinqueret, nunquam eam revisura. Venit itaque Cumas, ubi corporis viribus defecta in sola voce vitam retinuit. Quod ubi cognovissent illius cives, incertum invidia an commiseratione, epistolam ad eam miserunt creta antiquo more signatam. At illa, visa terra patria, in mortem resoluta est. Ita vati suae verba dedit Phoebus.At me non aetas mutabit tota Sibyllae.