Adagiorum Chiliades

IV. 1Palpo percutere.xxxv

Palpo percutere dicitur qui blanditur ac spem inanem verbis injicit. Plautus in Mercatore :

Liberum

Caput tibi faciam paucos menses. — Palpo percutis.

— Egon' ausim usquam quicquam facinus falsum proloqui ?

[Mercat., 152] Idem alibi : Mihi obtrudere non potes palpum. [Amph., 526] Translatum ab equisonibus, qui plausu manus blandiuntur equis. Vergilio tertio Georgicon libro :

Tum magis atque magis blandis gaudere magistri

Laudibus et plausae sonitum cervicis amare.

[Georg., III, 185] Horatius in Satyris :

Cui male si palpere, recalcitrat undique tutus.

[Serm., II, 1, 20]