IV. 1. Mercator est. xiv

Ἔμπορός ἐστι σκηπτόμενος, id est Mercatorem se adsimulat. Dicendum in eum qui ob timiditatem causas commentitias praetexit, ne cogatur subire discrimen. Suidas ex Aristophane citat, apud quem tum in Pluto tum in Ecclesiazusis quispiam inducitur loquens in hunc modum, ut dicat se fingere mercatorem esse, quoties ad bellum ire jubetur, quod negociatores non cogerentur exire, quoniam expediebat illos relinqui, quo de commeatu prospiciant. In Pluto sic habet locus :

Γεωργὸς εἶ; — Μελαγχολᾶν μ᾿ οὕτως οἴει; —

Ἀλλ᾿ ἔμπορος; — Ναί, σκήπτομαι γ᾿, ὅταν τύχω,

id est

Num cultor agri es ? — Mene sic furere putas ?

— Negociator ? — Simulo, si quando est opus.

Alter sic habet :

Ἀλλ᾿ ἔμπορος εἶναι σκήπτομαι,

id est

Quasi sim negociator, ita memet gero.

Non usquequaque discrepat hinc Evangelica parabola de his qui invitati ad nuptias variis causationibus excusant.

Index Adagiorum