Ἑορτὴ πολλὰς ἔχουσα, id est Festum multas habens, subaudiendum molestias, aut occupationes. Dictum in eos, qui magnas componerent sarcinas aliquo profecturi. Venustius erit, si deflectatur ad quosdam, qui nihil agunt quamvis exiguum nisi magno molimine, longa cunctatione, miro apparatu, ita ut saepenumero tum se, tum reliquos omneis defatigarint apparando, priusquam quicquam incipiant. Natum ab iis, qui festa solent adire. Nam iis mos, multam suppellectilem una secum convehere, vasa, vestes, sacra, panes atque id genus alia multa, ne quid deesset ad sollemnitatem pertinens. Extat in iisdem collectaneis.