Adagiorum Chiliades

III. 10Focus luculentus in aedibus.lxx

Primum domus ornamentum est, ut luceat focus ; proinde qui in aedes immigrant novas aut in diversorium ingrediuntur, ante omnia jubent ignem incendi. Quod ex Homeri X sumptum videtur, apud quem Ulysses :

Πῦρ νῦν μοι πρώτιστον ἐνὶ μεγάροισι γενέσθω,

[Od., XXII, *] id est

Nunc ante omnia mi lucescat in aedibus ignis.

Item illud celebratum :

Αἰθομένου δὲ πυρὸς γεραρώτερος οἶκος ἰδέσθαι,

[De uirtute et uitio, OM 2, 9, 100] id est

Scilicet accenso domus est ornatior igni.

Quo quidem versiculo videtur impendio delectatus Plutarchus, adeo subinde usurpat et in varios detorquet usus : in commentario De virtute et vitio refert ad opes, potentiam, gloriam, quae tum fiunt jucundiora, si adsit animus a molestia liber ; rursum in libello, quem Amatorium inscripsit, detorquet ad amantis animum longe splendidiorem, si calor amoris eum inflammarit.