Ταινάριον κακόν, id est Taenarium malum. Si quid crudelius saevitum esset in famulos, Taenarium malum vocabant, propterea quod olim Lacedaemonii captivos, qui in Taenarum confugerant, reductos capitis affecerunt supplicio. Est autem hoc loco Taenarus oppidum quoddam Laconicae, cujus incolae Taenaritae vocentur, et ejusdem regionis promontorium, in quo spelunca, per quam aditus erat ad inferos.