Ὗς διὰ ῥόδων, id est Sus per rosas. Quanquam in aliis exemplaribus scriptum invenio Ὗς διὰ ῥοίδων. Mihi neutra scriptura satis probatur, sed legendum arbitror διὰ ῥοιΐδων, ἀπὸ τῆς ῥοιᾶς, ut sit nomen diminutivum. Rhoeae vero Graecis dicuntur mala Punica. Eudemus proverbium citat ex Cratetis fabula, cui titulus Γείτονες, indicans dici solere de agrestibus et intractabilibus. Quemadmodum sus per mala commode duci non potest.