Adagiorum Chiliades

III. 7Phrynondas alter.xxii

Φρυνώνδας ἄλλος, id est Phrynondas alter. De improbo. Hujus meminit Lucianus in Pseudomante inter nobiles facinorosos. Phrynondas, cum esset hospes Athenis, in negotiis Peloponnesiacis versabatur, homo versutus, maleficus, impostor, summus malarum rerum artifex, ut hominis vocabulum in rei transierit appellationem. Etenim quoties insigniter malum et sceleratum accipi volebant, Phrynondam appellabant. Sic Aristophanes in Amphiareo, citante Suida :

Ὦ μιαρὲ καὶ Φρυνώνδα καὶ πονηρὲ σύ,

[Lex.] id est

Scelerate tu ac Phrynonda et impurissime.

Usus est et Plato in Protagora. Meminit horum et Aeschines adversus Ctesiphontem : Οὔτε Φρυνώνδας οὔτε Εὐρύβατος οὔτε ἄλλος οὐδεὶς πώποτε τῶν πάλαι πονηρῶν τοιοῦτος μάγος καὶ γόης ἐγένετο, [Ctes.] id est Nec Phrynondas nec Eurybatus nec alius quisquam veterum improborum unquam talis magus et impostor fuit.