Pensum persolvere est tuas implere parteis debitoque perfungi officio. Translatum a lanificio muliebri, in quo singulis certum lanae pondus in opus distribuebatur. Plautus in Persa : Pensum meum quod datum est, confeci. Idem in Bacchidibus : Ego pensum meum lepide accurabo. Et M. Tullius libro De oratore tertio : Nunc ad reliqua progrediar meque ad meum munus pensumque revocabo. Varro De re rustica : Nos nostrum pensum absolvimus. Hieronymus ad Rusticum : Et operis tui pensa persolvas. Verum quo longius erit detorta metaphora, hoc erit adagium venustius ; veluti si ad sermonem, ad studium, ad officium aut alias animi res referatur.