Σιφνιάζειν, id est Siphniassare. Suidas indicat proverbio dici solere pro eo, quod est manum admovere postico. Sumptum esse a moribus Siphniorum, qui libidinis causa id factitare consueverint. Est autem Siphnus insula quaepiam, haud procul a Creta, cui quondam nomen fuerit Merope, vel hoc nobilis elogio, una e Cycladibus. Refert eam et Plinius libro quarto, cap. XII. Proverbium indicat et Stephanus.