Ὗς ἐκώμασεν, id est Sus saltavit aut comessatur. Diogenianus ostendit dici solitum de iis, qui praeter decorum quippiam facerent quique rerum successu praeter meritum objecto semet insolentius efferunt. Attingunt et Suidas et Zenodotus. Est autem Graecis κωμάζειν juvenum amantium more coronis, cantilenis, saltationibus caeterisque juvenilibus nugis lascivire et in domos alienas irrumpere. Irrumpunt et sues, unde Theocritus in Syracusiis : Ἀθρόος ὄχλος / Ὠθεῦνθ᾿ ὥσπερ ὕες, id est Turba simul conferta suum more irruit. Caeterum qui rusticiore sunt ingenio, mirum quam haec dedeceant. Locus erit, ubi natura saevus et agrestis affectat videri festivus.