Δειπεῖν με δίδασκε, id est Cenare me doce. Proverbiali figura dictum est ab Aristophane in Ranis. Tempestiviter usurpabitur, si quando docere, praeire aut etiam refellere conatur aliquem imperitus negotii, de quo disceptatur. Verba sunt Bacchi ad Herculem de tragoediis judicantem, cum exercitatior esset in vorandis tauris quam pensiculandis poetarum carminibus.