I. 3. Columen familiae. xlii

Columen familiae dixit Terentius in Phormione, non dubium quin proverbaliter, Getam servum natu grandem, cui peregre profecturus tanquam paedagogo et curatori juvenum mores et rem domesticam senex commendarat. Donatus columen dici putat, perinde quasi columnam dicas, cui reliqua domus innitatur, unde antiquitus servos majores columellas dictos. Huic adstipulatur illud Vergilianum :

In te omnis domus inclinata recumbit.

Item illud Euripidis ex Iphigenia in Tauris :

Στῦλοι γὰρ οἴκων εἰσὶ παῖδες ἄρσενες,

id est

Domus columnae liberi sunt masculi.

Pindarus in Olympiis Hectorem appellat columnam Troiae :

Ὃς Ἕκτορ᾿ ἔσφαλε, Τροίας

Ἄμαχον ἀστραβῆ κίονα,

id est

Qui Hectorem subvertit, inexpugnabilem, immobilem columnam.

De Achille loquitur. His affine quod dixit Juvenalis :

Miserum est alienae incumbere famae,

Ne collapsa ruant subductis tecta columnis.