Ἐπὶ βύρσης ἐκαθίζετο, id est In tergore bovis desedit, id est Supplex implorat auxilia. Natum adagium a consuetudine vernacula Scythis, quemadmodum testatur Lucianus in Toxaride. Nam apud hos, si quis forte laesus esset neque suppeteret ulciscendi facultas, immolato bove carnes minutim sectas coquebat, ipse in tergore humi strato sedebat manibus in tergum reductis. Idque maximum supplicandi genus apud illos habebatur. Accedebat quiscumque vellet opitulari, et carnium portione gustata dextroque pede tergori imposito pollicebatur pro viribus auxilio futurum. Atque hoc foedus apud Scythas sanctissimum habebatur.