Ἀπιὼν ἐς Ἀπατούρια ἐπανῆκ᾿ ἐς Θαργηλιῶνα, id est Profectus ad Apaturia rediit Maio. Dici solitum in eos, qui licentius immorarentur negotio cuipiam. Athenis festum erat, quod Apaturia vocabant. Id triduo peragebatur. Primum diem appellabant Δόρπειαν, propterea quod sub noctem convenientes φράτορες convivium agerent. Secundum appellabant Ἀνάρρυσιν, quod in eo rem divinam facerent Jovi Phratrio ac Minervae, tertium Κουρεῶτιν, quod juvenes et puellae in gentem transcriberentur. Meminit Suidas copiosius de hoc festa. Verum ea non multum attinent ad explicandum proverbium.