Ἐκκέκοφθ᾿ ἡ μουσική, id est Interrupta est musica. Veteres in conviviis eruditis confabulationibus uti consueverunt. Post cantores, histriones, saltationes induci coeptae. Unde quidam moleste ferentes interrumpi sermones suos dicebant : Ἐκκέκοπται ἡ μουσική. Quae vox in proverbium traducta est, quotiens aliquis interveniens sermonem institutum interpellaret. Simile quiddam memini legere apud Platonem, licet in praesentia locus non occurrat.