Adagiorum Chiliades

III. 3Cui multum est piperis, etiam oleribus immiscet.xxxvii

Ὁ πολὺ ἔχων πέπερι τίθησι κἀν λαχάνοις, id est Qui multum habet piperis, etiam oleribus admiscet. Cui rei cujuspiam largior adest copia, ea profusius utatur licebit ; de pusillo parcius insumendum. Ut, cui multum suppetit facultatum, huic licet opipare vivere. Nam piper oleribus admisceri solere testatur et Martialis :

Ut sapiant fatuae, fabrorum prandia, betae,

O quam saepe petet vina piperque coquus.

[Epigr.] Nonnihil suspicor et hoc Apostolium a vulgi fece hausisse. [Paroem.] Tametsi utitur Hermolaus Barbarus in epistola quadam ad Picum. [Epist. Ill. Vir., 81, 43 Branca] Huic simile, quod alibi retulimus : Putre salsamentum amat origanum.