III. 3.Priusquam mactaris, excorias.xiii
Πρὶν ἐσφάχθαι δέρεις, id est Priusquam mactaris, excorias. Dicendum, ubi quid praepostere fieri videtur. Videri potest ex Homero sumptum, apud quem saepe excoriatur taurus, priusquam occiditur : figura, quam grammatici πρωθύστερον appellant. Finitimum illi, quod alibi retulimus, Actum agere. Nam id etiam adagium M. Tullius putat ad consilii praeposteri significationem pertinere. Sic enim scribit in dialogo De Amicitia : Praeposteris enim utimur consiliis et acta agimus, quod vetamur veteri proverbio.