Τὸ Φιλοξένου οὔ, id est Philoxeni non. Dicendum, ubi quis obstinate vel infitiatur vel recusat aut ubi quis alteri nescit concedere neque quicquam ad gratiam loqui. Quod genus homines a principum consuetudine debent abstinere, apud quos aut tacendum est aut loquendum, quod gratum sit auribus. Philoxenus poeta, quemadmodum alibi diximus, usque adeo non potuit carmina Dionysii probare, ut maluerit reduci ad fodinas lapidarias.