Βοῦς ἄμητον ἐπιτηροῦντες, id est Boves messem observantes. Dici solitum, ubi quis ingentium emolumentorum spe laborem sumeret. Quidam sic efferunt : Βοῦς εἰς ἄμητον, id est Bos in messem, subaudiendum respicit aut ejusmodi quippiam. Inde ductum, quod boves messis tempore majore laborant fructu, propterea quod inter trituram pascuntur interim et pabulum largius apponitur. Contra cum vere aut hieme proscindunt arvum, hoc molestior est arandi labor, quod nullo praesente fructu leniatur.