III. 2. Papyri fructus non postulat magnam spicam. xlvi

Βύβλου δὲ καρπὸς οὐκ αἰτεῖ μέγαν στάχυν, id est

Biblus virens haud postulat spicam gravem.

Etiamsi Graecus senarius vitiatus est in αἰτεῖ. Apud Aeschylum in Supplicibus ita legitur :

Βύβλου δὲ καρπὸς οὐ κρατεῖ στάχυν μέγαν,

id est

Fructus papyri haud sustinet spicam gravem.

Dici solitum de iis, qui suis ipsorum bonis frui non possent, propterea quod biblus ob culmos invalidos spicam granis onustam ferre non potest. Proinde prodit quidem spicas, sed inanes. Biblus autem junci species, quam Latini papyrum appellant. Apparet in Graeco carmine αἰτεῖ depravatum pro κρατεῖ, quod indicat vel ipsa metri ratio.