I. 3. Feras, non culpes, quod vitari non potest. xiv

Aulus Gellius scribit Publii mimi sententias aliquot ad communem sermonem accommodatissimas vulgo circumferri solitas, e quibus haec una est, quovis philosophorum dogmate salubrior :

Feras, non culpes, quod vitari non potest.

Quibus verbis admonemur, ut mala fatalia quae nulla ratione possint neque declinari neque propelli, saltem animi aequitate leniantur. Nec aliud, tametsi verbis aliis, docet Euripides in Phoenissis, cum ait :

Δεῖ φέρειν τὰ τῶν θεῶν,

id est

Toleranda fata numinum.

Idem in ejusdem tragoediae calce :

Τὰς γὰρ ἐκ θεῶν ἀνάγκας θνητὸν ὄντα δεῖ φέρειν,

id est

Quippe mortalem necesse est ferre fata numinum.

Homerus Odysseae libro nono :

Νοῦσόν γ᾿ οὔ πως ἔστι Διὸς μεγάλου ἀλέασθαι,

id est

Nulli fas vitare malum ex Jove rege profectum.

Huc pertinet et illud scitum Varronis dictum : Uxoris vitium aut tollendum esse aut ferendum. Item adagium quod suo dicemus loco : Μὴ πρὸς κέντρον λακτίζειν, id est Ne contra stimulum calcitres.