Κλεόκριτος, id est Cleocritus. Id nominis contumeliae causa jaciebatur in cinaedos ac molles et parum viros. Nam et hunc veteris comoediae maledicta nobilitarunt. Dictus est autem effeminatus, cinaedus, hospes, obscuro foedoque genere, Cybeles filius, quod Rheae mysteria ab exsectis eviratisque peragerentur. Ne forma quidem a moribus discrepabat ; nam facie velut avem referebat. Suidas nominatim proverbii loco refert, alioquin ipse non retulissem inter adagia.