Foenum esse et Ambrosia alendus. Utrumque proverbiali figura dixit M. Tullius, alterum in indoctos ac brutos homines, alterum in egregios, ut intelligas illos pecudibus, hos diis aequandos. Nam foeno victitant boves, ambrosia cibus est apud Homerum deorum αἰὲν ἐόντων. Cicero libro De oratore secundo : Sic ego Crasso audiente primum loquar de facetiis, et docebo sus, ut aiunt, oratorem eum quem cum Catulus nuper audisset, foenum alios aiebat esse oportere. Rursum idem eodem libro : Jocabatur, inquit, Catulus, praesertim cum ita dicat ipse ut ambrosia alendus esse videatur. Horatius praelautas opiparasque coenas deum coenas vocat : O noctes coenaeque deum, nectar et ambrosiam indicans. Nam haec illis tantum a poetis tribuuntur si quando domi cibum capiunt ; alioqui si contingat aliquo ad opimam victimam invitari, nidore carnium magis delectantur.