Dares Entellum provocas et proverbii speciem habet et apud eruditos videtur in jus proverbii cessisse. Sic enim Hieronymus ad Augustinum : Memento, inquit, Daretis et Entelli. Conveniet uti, si quando quispiam juvenili temeritate lacesset aliquem non perinde promptum ad suscipiendum certamen, verum intolerandum, si semel inierit. Qui senum ferme mos, ut libenter suffugiant negotia, suscepta pertinaciter gerant. Sumptum est ex quinto Aeneidos libro, ubi Dares quispiam viribus fretus et ferox juventa ultro prosiliens in medium quemvis ad certamen provocat, adsurgente nemine deterritisque reliquis, jam perinde quasi victor praemium flagitat ab Aenea. At Entellus senex et jam pridem ab hujusmodi genere certaminum feriatus, instigante partim Aceste, partim veterum victoriarum memoria, tandem surgit cestibus dimicaturus. Is diu suo consistens loco juvenem insolentius circumsilientem tulit, donec frustrato ictu lapsus, pudore sic recanduit ut Daretem jam longe imparem plane confecturus fuerit, nisi eum Aeneas intercedens eripuisset. Carmen ipsum Maronis adscriberem, est enim longe lepidissimum, ni et longiusculum esset et in promptu situm.