Αἰγύπτου γάμος, id est Aegypti nuptiae, inauspicatae et infelices dicebantur. Sumptum a notissima fabula Aegypti, qui filios quinquaginta totidem fratris filiabus maritos dedit. At hi praeter unum omneis a sponsis jugulati sunt. Torqueri poterit in simulatam amicitiam aut in munus honoris gratia datum in speciem, cum revera quaeratur pernicies ei cui datur. Ita nonnunquam ex affinitatibus aut foederibus principum atrocia nascuntur exitia.