Δόρυ κηρύκειον, id est Hasta caduceum. Dici solitum, quoties aliquis simul et minaretur et ad concordiam invitaret. Ex oraculo natum, quod hujusmodi fertur : Ἀνδρὶ Γεφυραίῳ φίλος οἶκος, id est Viro Gephyraeo grata est domus. Admoniti erant Gephyraei, ut sequentes Atheniensium exercitum, ubi illos defessos conspicerent, ibi manerent. Itaque cum Athenienses ab Eumolpo oppugnarentur, ad Tanagram iter instituerunt, hac specie, ut dux caduceum praeferret, juventus armata a tergo consequeretur, ut simul et pacem petere viderentur et ad bellum nihilo segnius parati, si quis lacesseret. Recenset Suidas et meminit Polybius libro Historiarum quarto. Legatum, inquit, ad Byzantios Aridicen misere et cum eo Polemoclen cum tribus triremibus, volentes, id quod est in proverbio, hastam simul et caduceum Byzantiis mittere. Simillimum est huic quod eleganter usurpavit D. Hieronymus : Scuto pacem petere.