II. 10. Matris ut capra dicitur. xiv

Τῆς μητέρος ὡς αἲξ καλεῖται, id est Matris ut capra dicitur. In spurios dictum videtur, quorum pater incertus est eaque gratia a matre denominantur. Ductum ab hoedis, qui in caprilibus a matre dignoscuntur ; nam a patribus haudquaquam possis. Potest et in jocum verti proverbium, velut si quis per lusum neget se patrem agnoscere, matrem scire : Τῆς μητρὸς ὡς αἲξ καλοῦμαι, id est Matris velut capra vocor. Manet etiam hodie vulgi jocus, quo dicunt esse filium, qui patrem suum norit. Hoc ab Homero manasse videtur, apud quem Odysseae primo Telemachus rogatus, num Ulyssis esset filius, respondet ad hunc modum :

Μήτηρ μὲν τ᾿ ἐμέ φησι τοῦ ἔμμεναι, αὐτὰρ ἔγωγε

Οὐκ οἶδ᾿· οὐ γὰρ πώ τις ἑὸν γόνον αὐτὸς ἀνέγνω,

id est

Esse quidem illius mater me ait, ast ego sane

Nescio ; nemo suum patrem unquam noverit ipse.

Index Adagiorum