Πλοῖον ἢ κυνῆ, id est Navis aut galerus. De re ancipiti, quod genus, si quis de voce incognita diceret : Aut piscem significat aut cucurbitam. Nec invenuste dicetur in eos, qui cultu moribusque diversam personam prae se ferunt, veluti si quis pallio philosophico balteum adderet militarem aut cultu monachum, moribus et lingua lenonem ageret. Fragmentum est senarii ex Avibus Aristophanis Πλοῖον ἢ κυνῆ, id est Aut galerus aut ratis. Sumptum ab hoc triremium genere, quas hodieque vulgo dicunt galeras, veluti dicas galeratas. Hae sic erant instructae, ut remos alarum vice porrigerent moverentque, caeterum summo malo galerum seu petasum instar Mercurii praeferrent. Nam Peloponnenses πέτασον, id est galerum, appellant κυνῆν ἀπὸ κυνὸς, a cane, quod hoc genus pilei primum e pellibus canum fieri consuevit. Hinc jocus militaris videtur fuisse natus in elatos et fastuosos supercilioque arroganti. Itidem Festus Pompeius indicat quasdam naves onerarias appellatas corbitas, quod in summo malo pro signo corbem haberent. Quae bello erant paratae, galeam habebant, aut quae ad celeritatem, petasum Mercurii signum gestabant.