Pulverem ob oculos offundere, dicitur qui de industria rem obscurat et adversario judicium eripit. Traductum videtur a militia. Saepe fit enim ut hostis data opera pulverem cieat in hostem. Hac arte Sertorius Romanus Cacitanos (ut Graecus habet, Characitanos) quosdam vicit, auctore Plutarcho, cujus rei mentionem fecimus in adagio De Caecia nubes attrahente. Utitur hoc proverbio praeter alios divus Hieronymus in epistolis. M. Tullius gloriatur se in actione quadam judicibus tenebras offudisse. Est apud Plautum in Milite simile quiddam de glaucomate oculis oborto.