Τὰ τῶν φόρων κρείττω, id est, Tributis potiora. Dicebatur, ubi quis ex malefactis et iniquitate commodum ingens reportaret. Refertur a Suida, et Zenodoto proverbii nomine nec pluribus explicatur. Harpocration in Dictionario rhetorico scribit extitisse in oratione Hyperidis adversus Athenogenem. Inde natum opinor, quod qui principum nomine tributum exigunt, fere plus extorquent, quam par est. Et principes sic petunt, ut ab invitis rapiant, ni dent quod petitur. Congruit huic illud Pindari ex Pythiis hymno octavo : Κέρδος δὲ φίλτατόν γ᾿, ἑκόντος εἴ τις ἐκ δόμων φέροι, id est Lucrum autem gratissimum, si quis ex volentis aedibus ferat.