Ἄχρι κόρου, id est Usque ad satietatem, id est quantumlibet aut ampliter. Quod ita demum proverbium fuerit, si longiuscule transferatur, ut In poeticis literis versatus sum ἄχρι κόρου et Illusit nobis ἄχρι κόρου et Quintilianus metaphoris gaudet ἄχρι κόρου. Idem composita voce dicunt κατακόρως, id est affatim. Julius Pollux addit πέρα κόρου, id est ultra satietatem. Atque ita vescentem indicat dici solere ἀδδηφάγον et κάβασον a κάβος, quod est tritici mensura, quemadmodum Latini bibacem dicunt tricongium. Itidem dicunt ἄχρι χείλους, id est usque ad labium, sumpta a vasis metaphora, et usque ad ambas aures, de quo meminimus alibi. Julius Pollux vas plenum appellat ἰσοχειλές sive ἐπιχειλές, redundans ὑπερχειλές, a labro vasis sumpta voce. Refertur a Zenodoto.