Ὑπὲρ τὰ Καλλικράτους, id est Supra fortunas Callicratis. De immensis opibus dicebatur. Aiunt Carystium quempiam fuisse nomine Callicratem, qui reliquos cives opibus longe praestiterit ; unde si quem magnopere locupletem intelligi volebant, eum vel Carystii Callicratis facultates vincere dicebant. Aristoteles autem in Atheniensium republica citante Suida tradit Callicratem quendam e judicum ordine fuisse, qui judiciarias exactiones supra modum auxerit, atque hinc natam paroemiam de immodicis exactionibus.