Ubi quis indecore quippiam facere conatur et invita, sicut aiunt, Minerva, camelum saltare dicebant, veluti si quis natura severus ac tetricus affectet elegans ac festivus videri naturae genioque suo vim faciens. Divus Hieronymus proverbii nomine citat torquetque in Helvidium. Risimus, inquit, in te proverbium Camelum vidimus saltitantem. Taxat Hieronymus hominis ineptiam, qui cum a Musis esset alienissimus, tamen disertus haberi vellet.