Οἱ φῶρες τὴν βοήν, id est, Fures clamorem, subaudiendum, timent aut senserunt. Quadrabit in eos, qui, sibi conscii, metuunt ne deprehendantur, aut qui peracto maleficio fugitant, pavitantque. Habet autem hoc cum omnis malefacti conscientia, tum praecipue furti, ut hominem trepidum reddat, ac lucifugam. Unde est in Hebraeorum sententiis impium vel persequente nullo fugere. Hoc adlusit Virgilius :
Tityre, coge pecus, tu post carecta latebas.Et cum clamarem, quo nunc se proripit ille ?