Adagiorum Chiliades

II. 7Obliquus cursus.liv

Κάμπιος δρόμος, id est Obliquus cursus. Quoties res arte ac dissimulanter agitur, aut quoties aliud prae nobis ferentes alio tendimus et cuniculis atque ambagibus quibusdam pergimus ad id, quod assequi conamur. Sumptum adagium a genere quodam cursus, qui κάμπιος dictus est, propterea quod anfractibus certis ac flexibus perageretur, ut in aliis impetus et celeritas plurimum valuerit, in hoc ars et ratio plus habuerit momenti. Hujusmodi cursus genus describit Vergilius libro quinto.

Olli discurrere pares atque agmina terni

Diductis solvere choris rursusque vocati

Convertere vias infestaque tela tulere.

Inde alios ineunt cursus aliosque recursus.

[Aen.] Ac paulo post :

Ut quondam Creta fertur Labyrinthus in alta

Parietibus textum caecis iter ancipitenque

Mille viis habuisse dolum, qua signa sequendi

Falleret indeprensus et irremeabilis error.

[Aen.] Potest et a navigantibus traductum videri, cum reflantibus ventis transversim navigant.