Μῦλος πάντ᾿ ἀκούων, id est Mylus omnia auscultans. Dici solitum, ubi quis se dissimularet audire fingeretque surditatem, cum omnia tamen auribus curiosis captaret auscultaretque. Tractum videtur a mola, unde exploratores observare soleant quae fierent, nam μύλον molam sonat Graecis, aut a Myli curiosi cujuspiam moribus. Zenodotus testis est Cratinum hoc usum adagio in Cleobulinis. Hesychius indicat Mylon fuisse poetam quempiam comicum, praeterea piscis esse nomen, mullum opinor sentiens. Ad haec μύλλον Graecis significare curvum, obliquum ac distortum ; scribit enim duplici λλ. De Carcini strobilis dictum est alias. Habent autem principes quidam et hoc sycophantarum genus, qui se fingunt surdos ac mutos, quo magis audita referant.