Τίκτει κόρη, ὅταν κακῶς ἀνδρὶ παρείη, id est Parit puella, cum male etiam adfuerit viro. Dici conveniet, quoties res facile conficitur ex sententia, etiamsi negligenter et ignaviter gesta fuerit. Veluti puella propter aetatis felicitatem facile gerit uterum, etiamsi cum viro non admodum viro rem habuerit ; non item anus, immo bis virum requirit aetas affecta mulieris. Ea res nec Augustinum fugit theologum ; nam quaestionem, quod Abraham auctore Paulo Sarae effoetus tamen ex Cethura sustulisse prolem legitur, sic explicat, ut dicat illum Sarae anui effoetum fuisse, Cethurae puellae fuisse virum. Egregium ingenium etiam sub malo et indiligente praeceptore bonas literas assequitur. Contra, si discipulus sit ὄνος λύρας, praeceptor etiam optimus oleum perdit et operam.