Τὸ θερμὸν τοῦ ὀβελοῦ, id est Calidam veruti partem, subaudiendum arripuit aut simile quippiam. Ubi quis per imperitiam negotii ea parte rem aggreditur, qua minime tutum fuerat aggredi, aut ubi quis ob inscitiam pro melioribus eligit pejora. Zenodotus ait hujus adagii meminisse Sophoclem. Sumpta metaphora ab iis qui per imprudentiam eam veruti partem manu prehendunt, quae calet, deinde offensi rejiciunt et alteram partem apprehendunt. Non usquequaque dissimile huic : Ἁλιεὺς πληγεὶς νόον οἴσει, id est Piscator ictus sapiet, quod alio loco retulimus.